اشعار استاد منزوی اردبیلی]
[Forwarded from اشعار استاد منزوی اردبیلی]
شهادت حضرت علی اکبر( ع )
جهاندا گورمسین هیچ بینوا اوغول ئولومی
هزار درده ایدر مبتلا اوغول ئولومی
جوان اوغول یریینده آتا اولار مسرور
ایدر آتانی قوجا وقتی شیر تک مغرور
اوغول ئوله آزالار فوری گوزلریندن نور
تز ئولدورر آتانی ای بسا اوغول ئولومی
بلی آتا گوزینه صبح تک ضیادی اوغول
گوزونده نور دیزینده بیوک قوادی اوغول
آتا قوجالسا النده گوزل عصادی اوغول
ویرر آتانون الینه گوزل عصا اوغول ئولومی
سئوال اولوندی بو سوز خاتم رسالتدن
ندور مصیبت اعظم هامی مصیبتدن
بفوری گوزلری ایسلاندی اشک حسرتدن
بویوردی قلبه ورار چوخ یارا اوغول ئولومی
دیدیلر ایله دوباره بیزه بو سری علن
ندور چتین بو مصیبتدن ای رسول زمن
دیدی اوغول ئوله تازه گلین چخا ایودن
ایله چتیندی که دوشمز یادا اوغول ئولومی
ایا رسول خدا آغلا نور عینون تک
گوتور عماموی ئوز شاه مشرقینون تک
اوغول اولا علی اکبر آتا حسینون تک
گور ایندی نیلر ایله مه لقا اوغول ئولومی
اوغول جنازه سی اوسته او سرور شهدا
دیوبدی حسرتیله یدی دفعه وا ولدا
گوروب قولاقینه گلمور اوغول سسی ابدا
دیدی نه مشگل اولور ای خدا اوغول ئولومی
ئورک دوزنمدی اسدی اوغول فراقندن
آلشدی جان و دلی ناز اشتیاقندن
اگلدی یوزیوه قویدی ئوپوپ دوداقندن
دیدی اوغول ایدر عمری فنا اوغول ئولومی
غریب آتون باشون اوسته ورور الین الینه
عمامه سین گوتوروب ختم مرسلین الینه
اوغول آنون الوی ویرمدی گلین الینه
اونیدا ایلدی بخت قرا اوغول ئولومی
واروندی دل دوداقونده اگر چه یاره دانش
گوزون فداسی اولوم ایلمه اشاره دانش
دلون تکلمه عاجزدی پاره پاره دانش
ایویمی یخدی بو قدی رسا اوغول ئولومی
استاد منزوی اردبیلی
نظرات شما عزیزان:
